Республикамиз бўйлаб Замонавий журналистикани ривожлантириш маркази – "BRYCA" томонидан "Ёшлар билан ишлашда медиа ва ахборот саводхонлиги" мавзуида семинар-тренинг ташкил этиляпти. Навбатдаги тадбир туманимизда ўтказилди. Жомбойлик соҳага қизиқувчи ёшлар танқидий фикрлаш, таҳлил, ташаббус ва таклиф бериш йўналишларида сабоқ олишди.
– Ахборот майдонида ёлғон хабарлар тарқалиши тобора авж олмоқда, – дейди медиатренер Гулшода Ҳусниддинова. – Оқимнинг шиддати эса уларни саралашда мураккаблик туғдираётгани ҳақиқат. Бунда аввало, ёшларнинг ишонувчанлиги, ҳиссиётга берилиши ёлғон тарқатишдан манфаатдор кучларга қўл келиши мумкин. Шу жиҳатдан ахборот ва янгиликлар билан ишлаш кўникмаси, саводхонлиги бугун ғоят зарур билимга айланяпти. Машғулотларда айни шу мавзуларга асосий эътибор қаратмоқдамиз. Нафрат нутқи, фейк ахборот ва кибербуллинг асослари бўйича амалий машқлар яхши самара беряпти.
Тадбир сўнгида иштирокчиларга махсус сертификат тақдим этилди.