Эски Жомбойда замонавий маҳалла маркази барпо этилди. Тадбиркор Мамаюсуф Шодмонов бир неча йил аввал давлат-хусусий шерикчилик асосида маҳалла биноси ва нуронийлар мажмуаси қуришни бошлаганди. Даставвал, кексалар учун тренажер, МФЙ ва савдо дўконидан иборат бино фойдаланишга топширилган эди. Бунёдкорлик ишлари давом эттирилиб, мини-стадион ва нуронийлар чойхонаси қуриб битказилди.
Мажмуанинг очилиш маросимида жамоатчилик вакиллари, фаоллар қатнашди.
– Тўрт йилча аввал бўш турган ҳудуддан обод ва сўлим маскан қуришни бошлагандик, – дейди М.Шодмонов. – Маҳалла аҳлининг фикри, маслаҳатини олдик. Ўз маблағимиз, етмаганига банк кредити ҳисобидан хайрли мақсадимиз бугун рўёбга чиқди. Яқинда аёллар тикувчилик цехини ҳам ишга туширамиз. Элликдан ортиқ киши иш билан таъминланади.
***
Қўғонсоломон маҳалласида иш бошлаган тикувчилик цехи ва гўзаллик салонида эса "Аёллар дафтари"га киритилган 25 нафар хотин-қизлар доимий даромад манбаига эга бўлди. Улар учун "Саховат ва кўмак" жамғармаси ҳисобидан замонавий тикувчи машинаси ҳамда гўзаллик салони анжомлари ажратилди.
Енгил саноат корхоналаридан буюртма олишда ҳам амалий ёрдам кўрсатилмоқда.