Sektor rahbarlari aholini tingladi

Xalq qabulxonasida navbatdagi sayyor uchrashuv tashkil etildi. Tadbirda tuman hokimi va sektor rahbarlari aholi murojaatlarini qabul qildi.

Turli mavzudagi ellikdan ortiq muammo va takliflar orasida ichki yo‘llarni ta’mirlash, elektr energiyasi va suyultirilgan gaz yetkazib berish bilan bog‘liq murojaatlar ko‘pchilikni tashkil etdi. Shuningdek, tadbirkorlikni yo‘lga qo‘yish istagidagi fuqarolar ham ishtirok etdi.

Jumladan, Eski Jomboy mahallasidan kelgan F.Ergashev biznes rejasini ro‘yobga chiqarish uchun imtiyozli kredit olishda amaliy yordam so‘radi. Qo‘ng‘irotlik I.Hotamov esa issiqxona yo‘nalishida tadbirkorlik boshlagani, ammo ta’minotchi tomonidan ishlar sifatsiz bajarilganidan noroziligini bildirdi.

Barcha murojaatlar yuzasidan mas’ullar biriktirildi. Muddat belgilanib, ijrosi nazoratga olindi.