Хитойболадан 1700 йиллик кўзалар топилди

jpg jpeg gif png txt doc docx xls xlsx pdf ppt pptx pps ppsx odt ods odp mp3 mov mp4 m4a m4v mpeg avi ogg oga ogv weba webp webm

Юртимиз бой тарихи, маданий ёдгорликлари билан сайёҳларни ўзига жалб этиши бежиз эмас. Археологик изланишлар давомида аниқланаётган кўҳна қадамжолар бу ўлканинг инсоният цивилизацияси учун бешик бўлганидан далолат беради.

Бундай топилмалар туманимизда ҳам учраб туради. Бир неча йил аввал Ногаҳон қишлоғида қадимий тангалар, кулолчилик намуналари қайд этилганди. Яқинда Қўнғирот маҳалласининг Хитойбола қишлоғида ҳам шу каби ҳолат кузатилди. Дала майдонидан топиб олинган кўза парчалари милодий III-IV асрларга оидлиги айтилмоқда.

Маълум бўлишича, ҳозирда фермер хўжалигига тегишли бўлган ер майдони ўрнида қачонлардир кўҳна тепаликлар бўлган. Собиқ тузум даврида пахта сиёсати сабаб текисланиб, экин майдонларига қўшиб юборилган. Фермер хўжалиги ишчилари ғалла суғориш жараёнида ер сатҳига чиқиб қолган сопол парчаларини кўриб қолишади. Қишлоқ зиёлиларининг саъй-ҳаракати билан археологлар жалб этилиб, ҳудудда қисқа ўрганиш ўтказилди.

– Хитойболада аниқланган сопол парчалари ва инсон суяги қолдиғи кўздан кечирилди, дастлабки хулосалар милоднинг илк асрларига тегишлилигидан дарак беряпти, – дейди Миллий археология маркази илмий ходими С.Хўжамов. – Ўша давр одамларининг урф-одатларига назар солсак, жасадни озиқ-овқат ва моддий бойликлар билан дафн этишганини кўрамиз. Қолаверса, кўза парчасининг ясалиш услуби ҳам милодий III-IV асрларга тааллуқли. Бу бошланғич хулоса, ҳудуд жиддий тадқиқ этилиши керак.

Дарҳақиқат, юртимиздаги кўпгина тарихий манзиллар ҳанузгача ўрганилгани йўқ. Афсуски, бир вақтлар ўн беш мингтадан ортиқ бўлган катта-кичик тепаликлар тобора нураб, йўқлик сари юз тутмоқда. Айримлари “тадбиркор”лар томонидан эгаллаб олинаётгани эса ачинарлидир. Қўнғирот маҳалласида истиқомат қилувчи меҳнат фахрийси Раббимқул Исломовнинг айтишича, шу қишлоқнинг ўзида қачонлардир ўнлаб қадимий тепаликлар бўлган. Бугунгача сақланиб қолганлари ҳам оғир аҳволда.

Ўйлаймизки, миллат тарихини сақлаб қолиш, ўрганиш, келажак авлодга етказиш учун масъул бўлган соҳа вакиллари зарур чораларни кўришади.

Дилмурод МАҲРАМОВ,

Адолат социал-демократик партияси туман кенгаши Ёшлар қаноти раиси.

2015-2024 © Жомбой туман ҳокимлиги. Сайт яратувчиси: SAKTRM