O‘zbekiston Respublikasi davlat bayrog‘i qabul qilingan kun munosabati bilan tumanimizda bayram tadbirlari o‘tkazildi. Jumladan, ta’lim muassasalarida badiiy kecha, davra suhbatlari va uchrashuvlar o‘tkazildi.
29-umumta’lim maktabida “Ajdodlarimizdan meros – g‘urur timsoli” mavzuida ochiq muloqot tashkil etildi. Unda bayroq tushunchasi, millat g‘ururini uyg‘otishdagi ahamiyati o‘quvchilarga tushuntirildi.
30-umumtaʼlim maktabida esa boshlang‘ich sinf o‘quvchilari “Hilpirayver, bayrogʻim” bayram tadbiri o‘tkazildi. Bolajonlar ijrosidagi she’r va qo‘shiqlar tadbirga o‘zgacha shukuh berdi.
***
Shunday tadbirlar 9-davlat maktabgacha ta’lim tashkilotida ham bo‘lib o‘tdi. Buyuk ajdodlarimiz siymosi aks ettirilgan sahna tomoshasi barchaga manzur bo‘ldi. Bolajonlar “Bayrog‘im, g‘ururim, iftixorim” mavzuida bilimlarini mustahkamlashdi.
16-davlat maktabgacha ta’lim tashkilotida o‘tgan tadbirda mahalla faollari va ota-onalar taklif etildi. Bayrog‘imizda aks etgan ramzlar, ranglar mohiyati haqida so‘z yuritildi.
Bolajonlar qalbiga Vatanga muhabbat, ajdodlar shon-shavkatidan g‘ururlanish tuyg‘usini singdirish muhim ahamiyat kasb etadi. 32-davlat maktabgacha ta’lim tashkilotida ushbu jihatga e’tibor qaratildi. Mavzuga doir she’r va qo‘shiqlar, raqslar ijro etildi.
Bayram tadbirlari davom etmoqda.